Работни налози
Евидентирајте посета на техничар кај купувач, со потрошените часови и делови, и одлучете како ќе се наплати.
Работниот налог ја евидентира работата кај купувач: кој одел, колку часови потрошил и кои делови ги искористил. Деловите што техничарот ги зема, а не ги потроши, се враќаат на залиха, па се наплатува и се пресметува трошок само за потрошеното. Работниот налог потоа се фактурира, се покрива со договор за одржување или е без наплата.
Потребно е: дозвола за Продажба, вклучен модул Работни налози, купувачот, услуга за часовите, артикли на залиха за деловите и активна серија на документи за работни налози.
Пред да започнете
- Вклучете го модулот во Поставки → Модули → Работни налози. Во менито се појавува Продажба → Работни налози.
- Внесете ги техничарите во Поставки → Вработени: име, работно место и интерен Трошок по час. Трошокот е колку чини еден час за Вашата компанија, а не колку плаќа купувачот, и од него се пресметува трошокот за труд и маржата. Техничарите не мора да бидат корисници на Prospect.
Креирајте работен налог
Отворете Продажба → Работни налози и изберете Креирај. Ако работата е запишана на однапред отпечатен хартиен налог, внесете го неговиот број во Шифра; во спротивно оставете го предложениот.
Изберете Купувач, Датум на работата и, ако има делови, Магацин од кој се земаат. Опишете ја работата во Извршена работа.
Во Часови додадете ставка за секој техничар: Вработен, Услуга, Часови и Цена по час. Цената доаѓа од ценовникот на купувачот или од продажната цена на услугата. За поинаква цена за оваа работа внесете Цена по час во заглавието; таа важи за сите ставки.
Во Делови додадете го секој дел со Земено количество. Патот или излезот на терен се само уште една услуга во Часови.
Отштиклирајте Наплата на ставка што купувачот не ја плаќа, на пример дел заменет во гаранција. Ставката останува на налогот и нејзиниот трошок се смета, но не оди на фактурата.
Издајте делови, па завршете
| Чекор | Што се случува |
|---|---|
| Издај делови | Земените делови излегуваат од магацинот на датумот на налогот. Налогот е Во тек. |
| Работата е готова | Внесете го вратеното во Вратено. Потрошено е земено минус вратено. Додадете делови земени подоцна и поставете Завршено на ако работата завршила подоцна. |
| Заврши | Деловите што уште не излегле излегуваат, вратените се враќаат на датумот Завршено на, а налогот се заклучува. |
Додека налогот е во тек, шифрата, датумот, купувачот и магацинот не се менуваат. Дел што веќе излегол од магацинот не може да се отстрани или замени; непотрошеното количество внесете го во Вратено.
Работа што ја внесувате подоцна, од хартиен налог, не го бара првиот чекор: пополнете Земено и Вратено и изберете Заврши.
За да поништите налог во тек или завршен налог, изберете Откажи од менито ⋯. Сите делови што се уште се надвор од магацинот се враќаат. Налог што е на фактура не може да се откаже додека фактурата не се избрише или сторнира.
Одлучете како се наплатува
Картичката Наплата на дното од налогот има три избори:
| Избор | Кога |
|---|---|
| Фактура | Купувачот ја плаќа оваа работа. Ова е стандардно. |
| Покриено со договор | Повторлива фактура веќе го наплатува одржувањето кај купувачот. Изберете ја таа фактура. |
| Без наплата | Гаранција, добра волја или интерна работа. Изберете причина и по потреба белешка. |
По промена изберете Зачувај наплата. Според ЗДДВ, бесплатно дадени добра или услуги може да се сметаат за оданочив промет; работата во гаранција обично е покриена со првичната продажба, но другата бесплатна работа проверете ја со сметководителот.
Фактурирајте работни налози
Завршен налог што чека фактура во листата е означен За фактурирање.
- Еден налог: отворете го и изберете Креирај фактура на картичката Наплата.
- Повеќе налози на еден купувач: означете ги во Продажба → Работни налози и изберете Креирај фактура. Изберете Спој исти артикли (иста услуга или дел по иста цена станува една ставка) или Посебна ставка за секоја ставка од налог (секоја ставка го задржува налогот и името на техничарот).
Prospect креира нацрт фактура со часовите и потрошените делови за наплата, а налозите ги наведува во забелешката. Проверете ја и потврдете ја како секоја друга фактура. Деловите веќе излегле од магацинот со налогот, па фактурата не ја менува залихата повторно и не бара испратница.
Додека фактурата важи, налогот е означен Фактуриран со врска до неа. Ако ја избришете нацрт фактурата или ја сторнирате потврдената, налозите повторно може да се фактурираат.
Печатете работен налог
Од менито ⋯ изберете Печати за примерок без цени што купувачот го потпишува, или Печати со цени. На отпечатениот налог се извршената работа, часовите и потрошените делови, со места за потпис на техничарот и на купувачот.
Трошоци и маржа
Збирот на секој налог ги покажува износот за наплата, трошокот за труд (часови по трошокот по час на секој вработен, каков што бил кога е зачувана ставката), трошокот за делови и маржата. Трошокот за делови е проценка по тековната просечна цена додека деловите не се издадат, а потоа е вистинскиот трошок на потрошеното.
Извештаи → Трошоци по работни налози за избран период покажува:
- По купувач: бројот на налози, часовите и колку е фактурирано, останува за фактурирање, е покриено со договор или е без наплата, наспроти трошокот.
- Договори за одржување по месец: трошокот на налозите што ги покрил секој договор наспроти она што договорот го фактурирал тој месец, и маржата.
Извештаи → Бруто добивка ги смета деловите потрошени на работни налози како трошок на купувачот кај кого се потрошени.